عادل عەبدولمەهدی: دەروازەیەکی سنوری لەگەڵ ئێران داخست

بە فەرمانی سەرۆکوەزیرانی عێراق، دەروازەی سنووریی مەندەلی لە پارێزگای دیالە لەگەڵ کۆماری ئیسلامیی ئێران داخرا.

 

فەریق روكن محەممەد حەمید كازم سكرتێری فەرماندەی گشتیی هێزە چەكدارەكانی عێراق رۆژی 7ی ئەم مانگە، نووسراوێكی نهێنی بۆ  دەستەی دەروازە سنوورییەكان ناردووە لەبارەی پێشلكارییەكانی دەروازەی سنووریی مەندەلی.

 

لە نوسراوەكەدا ئاماژەی بەوە كردووە عادل عەبدولمەهدی سەرۆكوەزیران رەزامەندی داوە لەسەر داخستنی دەروازەكە و گواستنەوەی سەرجەم فەرمانبەرانی بۆ دەروازەیەكی دیكە.

 

قاسم مەعمووری ئەندامی ئەنجوومەنی پارێزگای دیالە لە لێدوانێکدا دەڵێت،” کێشە و کەموکورتی لە بەڕێوەبردنی دەروازەکەدا هەبووە لایەنێک لەو دەروازە سنوورییە باڵادەست بووە و دەستووەردانی کردووە”.

 

دەروازەکە بەیەکێک لە دەروازە گرنگەکان دادەنرێت بۆ ناوچەکە لە ڕووی ئابورییەوە، و داهاتی مانگانەی سنوری مەندەلی نزیکەی 600 بۆ 700 ملیۆن دینارە.

 

 

 

هەواڵ. شەهێن وەهاب