ژیان لەو بێ ڕەنگییانە زیاترە

ژیان لەو بێ ڕەنگییانە زیاترە، تۆیەکی ڕۆحانی خۆتی پێ کاڵ ئەکەیتەوە، ئاخر مەگەر هەر خەیاڵ رۆح بکاتە رۆحانی و مەگەر هەر شەونمی بەیانیان دڵ لە نیگای سروشت تێرکا، تۆ رۆژەکانی هەفتە بژمێرە و هیچ رۆژێک بێ ڕەنگ مەمێنەرەوە، رەنگەکان دەبێ بێنە ژیانتەوە، بێنە گیانتەوە، بێنە رۆحتەوە، دەبێ رۆژێک نا و دووان نا و سیان نا ، تۆ دەبێ هەمیشە رەنگین بیت، پەی بردن بە رەنگینی ژیان بۆ هەمووان وەک یەکە، تۆ ساز بیت یا پەری، تۆ رەهێڵەبیت یا کڕێوە، تۆ شەبەنگ بیت یا شەونم، مانگەشەو رەنگەکان رازاندوویانەتەوە، مانگی چواردە بێ رەنگەکان سەردەرناکا، تۆش بێ رەنگەکان وونی، من بیر لە هەموو ئەو رەنگانە ئەکەمەوە دەشێ لە تۆوە بن، ئاخر هەر بوونێکت رەنگێک وهەر بۆنێکت رەنگێک و هەر هەنگاوێکت رەنگێک، تۆ هەموو رەنگەکان دەپۆشی و تۆ هەموو رەنگەکان دەنۆشی، ئەوەی نابێ بچی بە لایەوە، ئەوەی نابێ پێت بکەوێ، سەراوژێری رەنگی تەنیاییە، مەهێڵە تەنیایی بێتە گیانتەوە، ئەی رەنگینترین ڕەنگی ئاوەدانی.

 

موئمین زەڵمی