کەرکوک؛ هاوپەیمانی بەجیا لەگەڵ یەکێتی و سۆشیالیست کۆبوویەوە

دەڤەری کەرکوکی هاوپەیمانی بەجیا سەردانی هەریه‌ك له‌ یەکێتی نیشتمانی کوردستان و حزبی سۆشیالیست دیموکراتی کوردستانی کرد.

 

ئەمڕۆ شاندێكی دەڤەری کەرکوکی هاوپەیمانی کە پێکهاتبون لە محەمەد سەعید ئەندامی ئەنجومەنی نوێنەرانی هاوپەیمانی و تاریق تەها به‌رپرسی په‌یوه‌ندییه‌كانی دەڤەر، سەردانی مەڵبەندی یەکێتیان کرد و لەلایەن وشیار مەلا عبدوڵا و جەنگی پاشا، ئەندامانی مەڵبەندی كه‌ركوكی ئەو حزبەوە پێشوازیان لێکرا.

 

هەر ئەمڕۆ شاندێکی هاوپەیمانی، بە سەرپه‌رشتیی کامل جەلال کارگێڕی دەڤەر و سەلام عەزیز و محەمەد سەعید ئەندامانی ئەنجومەنی نوێنەران و تارق تەها و خاڵە شهاب ئەندامانی ئەنجومەنی دەڤەر، سەردانی مەڵبەندی کەرکوکی حزبی سۆشیالیستیان کردوو لە لایەن بەرپرسی مەڵبەند و بەرپرسی پەیوەندیەکانی ئەو حزبەوە پێشوازیەکی گەرمیان لێکرا.

 

لەمیانه‌ی هەردوو سەردانەکەدا، شاندی هاوپەیمانی دید و ڕوانینی هاوپه‌یمانییان خستەڕوو، هه‌روه‌ها جەختیان لە یەکڕیزی و هەماهەنگی نێوان سەرجەم لایەنە سیاسییەکانی کوردستان کردەوە،  لایەنی بەرامبەریش خۆشحاڵی خۆیان بۆ شاندەکانی هاوپەیمانی دەربڕی و جەختیان لە کاری پێکەوەیی کردەوە.

 

ئەم سەردانانەی دەڤەری کەرکوکی هاوپەیمانی درێژەی سەردان و دیدارەکانی ئەو دەڤەرەیە بۆلای سەرجەم لایەنە سیاسیەکان و ڕێکخراوەکانی ئه‌و سنووره‌.