“هێزەکان ئامادە نەبون بەرژەوەندیەکانیان بکەنە قوربانی خوێنی شەهیدانی هەڵەبجە”

بچووکردنەوە گەورەکردن

ئەندامیکی ئەنجومەنی نوێنەرانی هاوپەیمانی” هەر لەسەرەتاوە هێزە سیاسییەکان دەستی دەستیان بە مەسەلەی ئەنجومەنی پارێزگاکەوە کردو خەڵکی هەڵەبجەو ڕێکخراوەکان داوایان کرد لەبەر خاتری خوێنی شەهیدان واز لە بەرژەوەندییە حزبیەکانتان بهێنن، بەڵام هیچ کام لە حزبەکان ئامادە نەبون و هەڵەبجەیان کردە قوربانیی بەرژەوەندیی تەسکی خۆیان”

 

دانا عەبدول ئەندامی ئەنجومەنی نوێنەرانی هاوپەیمانی نیشتمانی بە دیجیتاڵ میدیای هاوپەیمانی ڕاگەیاند بەداخەوە کە بەباتی کاراکردنی ئەنجومەنی پارێزگای هەڵەبجە پێنج ساڵی خایاندوە و تا ئێستا هیچ ئەنجامێکی دڵخۆشکەر نیە بۆ هاوڵاتیانی شارەکە.

 

دانا عەبدول لە بەشێکی تری قسەکانیدا وتی ” دوای ٥٦ کۆبونەوەو دوو ڕیککەوتن و یاداشتێکی لێک تێگەیشتن بەداخەوە هێشتا لە قۆناغی سەرەتاداین و هێزە سیاسیەکان هەر جارەو یەکێکیان دەبێتە ڕێگر لە بەردەم کاراکردنی ئەنجومەنەکەو ناهێڵێت هاوڵاتیانی پارێزگاکە هەست بە پارێزگابوونی شارەکە بکەن بەشێوەی کردەیی”

 

بەرپرسەکەی هاوپەیمانی ئەوەشی نەشاردەوە کە هێزەکانی دەسەڵات نایانەوێت سازش لە بەرژەوەندییە تەسکە حزبیەکانیان بکەن لە پێناو گەورەیی هەڵەبجەداو خەڵکی شاەرەکەو ڕێکخراوەکانی کۆمەڵی مەدەنی چەندین جار تکایان لە هێزەکان کردوە کە بەرژەوەندیەکانیان وەلا بنێن لە پێناو خوێنی شەهیدان و گەورەیی شارەکەدا بەڵام بەداخەوە ئەمە نەکراو هێزەکان ئامادەنەبون ئەو کارە بکەن.

 

دانا عەبدول ئەوەشی خستەروو کە هەمیشە بابەتەکانی هەڵەبجە گرێدراون بە کارەکانی پارێزگاکانی تر و ڕێککەوتنەکانی هێزەکانەوە لە پارێزگاکانی تر، جارێک دەبەسترێتەوە بە زاخۆوە جارێکی تریش بە سلێمانیەوە گرێدراوە، هەر لە درێژەی لێدوانەکەیدا بەرپرسەکەی هاوپەیمانی وتی ئەم ئەنجومەنە لەسەر بنەمای هەڵبژاردنی ساڵی ٢٠١٤ کراوە کە ئەمە جۆرێکە لە نادادی و کێشەی گەورەی بۆ سەرجەم هێزەکان دروستکردوە چونکە دوای ئەو هەڵبژاردنە دوو هەڵبژاردنی تر کراوە کە ڕێژەی دەنگو قورسایی لایەنەکان گۆڕانکاریی زۆری بەسەردا هاتوەو هێزی نوێ لە گۆرەپانەکە دروست بوون و دەنگی باشیان هێناوەو ئێستا لە ئەنجومەنەکە بێبەش دەبن ئەگەر کارا بکرێت.

 

سەبارەت بە ڕۆڵی پارێزگاری شارەکە لە بابەتەکەدا ئەندامەکەی ئەنجومەنی نوێنەرانی هاوپەیمانی ڕایگەیاند کە بەداخەوە پارێزگار و بەرپرسانی هێزەکان لە شارەکە بونەتە قوربانی و جۆرێک لە ئیحراج بوون بەوەی کە ئەوان لەگەڵ هێزەکانی تر ڕیک دەکەون و دەگەنە ئەنجام بەڵام بەرپرسانی باڵای هێزەکان، ئەوانەی کە ماندوو نەبون بە شارەکەوە بریارەکەیان پێ هەڵدەوەشێننەوەو ڕێککەوتنەکان تێکدەدەن.

 

لە کۆتایی مانگی ڕابردودا هێزەکانی هەڵەبجە ڕێککەوتن و واژۆی ڕێککەوتنەکەیان کرد بۆ ئەوەی ئەنجومەنی پاریزگاکە کارا بکەن و هەر هێزەو نوێنەری خۆی دیاری کردو پارێزگاریش وەک لایەنی بەرپرس نوسراوی کرد بۆ وەزارەتی ناوخۆو حکومەتی هەرێم بەمەبەستی دەستبەکار بوونی ئەندامانی ئەنجومەنەکە، بەڵام بەشێوەیەکی چاوەروان نەکراو دوێنێ ١١ ئەیلول پاریزگاری هەڵەبجە نوسراوێکی کردوە بۆ وەزارەتی ناوخۆی حکومەت بەمەبەستی ڕاگرتنی نوسراووی پێشوو، ئەم کارەی پارێزگار نیگەرانی هێزە سیاسیەکان و هاوڵاتیان و ڕێکخراوەکانی شارەکەی لیکەوتەوەو کاردانەوەی زۆری بەداوای خۆیدا هێنا.

 

ژوری هەواڵ