“ئێمە لەگەڵ هەر داوایەکی ڕەوای خۆپیشاندەرانین”

بچووکردنەوە گەورەکردن

بەرپرسی تیمی وتەبێژانی هاوپەیمانی ڕایگەیاند” ئێمە لەگەڵ هەرداوایەکی ڕەوای خۆپیشاندەرانین و داوا لە هێزە ئەمنیەکان دەکەین خۆیان بپارێزن لە هێرشکردنە سەر خۆپیشاندەران و پێویستە ئەوانیش خۆیان بەدور بگرن لە ڕێگەی نامەدەنی”

 

 

شوان عوسمان بەرپرسی تیمی وتەبێژانی هاوپەیمانیی نیشتیمانی لە لێدوانێکدا بۆ دیجیتاڵ میدیای هاوپەیمانی ڕایگەیاند هاوپەیمانی بە تەواوی پشتیوانیی خۆی دووپاتدەکاتەوە بۆ هەر داوایەکی ڕەوای خۆپیشاندەران لەهەرشوێنێک بن.

 

 

سەبارەت بە خۆپیشاندانەکانی چەند رۆژی رابردووی چەند پارێزگایەکی عێراق بەرپرسەکەی هاوپەیمانی ئاماژەی بەوەکرد، پێویستە هێزە ئەمنیەکان و حکومەت زۆر بە هێمنی لەگەڵ خۆپیشاندەران هەڵسوکەوت بکەن و بەهیچ جۆرێک توندوتیژی بەکار نەهێنن چونکە ئەو کەسانەی کە ڕژاونەتە سەر شەقامەکان ڕۆڵەی ئەم نیشتمانەن و بە دڵنیاییەوە گەندەڵی و نادادی وایلێکردوون بڕژێنە سەر شەقامەکان و داوای مەفەکانیان بکەن.

 

 

هەر لە درێژەی لێدوانەکەیدا شوان عوسمان وتی” لە هەمانکاتدا داوامان لە خۆپیشاندەران ئەوەیە بە شێوەی سەردەمیانە و شارستانی داوای مافەکانیان بکەن و موڵک و ماڵی دەوڵەت بپارێزن و بیر لەوە نەکەنەوە بەو ڕێگایانە دەتوانن مافەکانیان بەدەست بهێنن”

 

 

لەکۆتایی لێدوانەکەیدا بەرپرسەکەی تیمی وتەبێژان ئەوەشی خستەڕوو، کە داوا لە حکومەتی عێراق دەکەین بە زویی بەدەم داواکاریەکانی خۆپیشاندەرانەوە بچێت و داواکاریەکانیان جێبەجێبکات و خزمەتگوزاری و مافە سەرەتاییەکان دابین بکات بۆ دانیشتووانی ئەو پارێزگایانە و تەواوی عێراق بە گشتی.

 

 

ماوەی سێ ڕۆژە لە چەند پارێزگایەکی عێراق خۆپیشاندان سەریهەڵداوە و لە هەندێک پارێزگاو ناوچە گرژی و پێکدادان ڕویداوە لە نێوان هێزە ئەمنیەکان و خۆپیشاندەراندا و لە ئاکامدا ژمارەیەک خۆپیشاندەر کوژراون و ژمارەیەکی زۆریش بیرندار بوون و لە چەند ناوچەیەکیش هاتوچۆ قەدەغەکراوە و هێڵەکانی پەیوەندیش ڕاگیراون.

 

 

ژوری هەواڵ