ڕاگەیەنراوێک لە هاوپەیمانیی نیشتمانیەوە

هاوڵاتیانی بەشەرەفی هەرێمی کوردستان جەماوەری تێکۆشەری دەڤەری ڕاپەڕین.

 

لە ساڵیادی ۲۸ ساڵەی چەخماخەی ڕاپەڕینە پڕشکۆکەی دەڤەری ڕاپەڕین و سەرهەڵدانی ڕاپەڕینی سەرتاسەری کوردستان بۆ ڕاماڵینی دامودەزگا داپڵۆسێنەرەکانی حیزبی بەعس و کۆتایی هێنان بە دەسەڵاتی ستەمکارانەی ئەو حیزبە، سڵاو و ڕێز بۆ گیانی پاکی شەهیدان سەربەرزیی بۆ بنەماڵە بەڕێزەکانیان ڕێز و پێزانین بۆ خەبات و قوربانیدانی سەرجەم شۆڕشگێڕانی ڕێگای ڕزگاری کوردستان.

 

بەداخەوە، لەکاتێکدا هاوڵاتیانی هەرێمی كوردستان یادی ٢٨ ساڵەی ڕاپەرین دەكەنەوە کە دۆخی سیاسی هەرێمی كوردستان و بژێوی و باری ژیان و گوزەرانی هاوڵاتیان لەبارێکی نالەباردایەو زۆرێك لەو ئامانجانەی كە راپەڕینی لەپێناودا كرا، هەرلە دەستەبەرکردنی ماف و ئازادییەکان و پاراستنی شکۆی مرۆڤ و دابینکردنی خۆشگوزرانی بۆ هاوڵاتیان، تادەگاتە چەسپاندنی بنەماکانی دیموکراسی ڕاستەقینە و بنیاتنانی حوكمڕانییەكی باش، بەدینەهاتوون و هاوڵاتیان لە لوتکەی بێئومێد و نیگەرانیدا ژیانی کولەمەرگی بەسەردەبەن.

 

جگەلەوەی ئەمڕۆ نەوەیەک داوای ماف و ئازادی دەکات کە ئەو سەروەریانە ناکەنە پاساوی نادادی و گەندەڵی و شکستی حوکمڕانی، چاویان لە ژیانیکی باشتری هاوشێوەی گەلانی پێشکەوتووی دونیایە و هاوڵاتیان بەبێزاری و توڕەییەوە لەچاوەڕوانی باشکردنی دۆخەکەدان و نموونەی گەلێکی ئارامگرن و لەبری دەسەڵاتداران هەست بە بەرپرسیارێتی دەکەن.

 

ئێمە لە هاوپەیمانیی نیشتمانی سەرەڕای ڕەخنە و نیگەرانی زۆرمان لە سەر تیکڕای سیستمی سیاسی و حوکمڕانی لەهەرێمدا ، بە گەشبینیەوە دەڕوانینە داهاتوو، لەو پێناوەشدا پشتیوانی هەر هەنگاوێك دەکەین بە ئاراستەی چاکسازی و گۆڕانکاری ڕیشەیی و هیواخوازین هەموان بەگیانی بەرپرسیارێتیەوە مامەڵە لە گەڵ بارو دۆخەکەدا بکەن و کۆتایی بە ناکۆکی و بەرژەوەندییە تایبەتەکان بهێنن و لە پێناو یەکڕیزی وبەرژەوەندی گشتیدا و لە زووترین کاتدا کابینەی نۆی حکومەتی هەرێمی کوردستان پێکبهێنرێت، کە ئەرکی لە پێشینەی دابینکردنی بژێوی خەڵك و کۆتایی هێنان بە گەندەڵی بێت و لە ئاست چاوەڕوانی هاوڵاتیان وتێپەڕاندنی قەیرانەکاندا بێت و چیتر قەیران بە قەیران چارەسەرنەکرێت و کۆتایی بەم نەهامەتی و ستەمە بهێنرێت و پێکەوە کاربۆ ئارامی و پێشکەوتن و ئاوەدانی و خۆشگوزەرانی بکەین .

 

سڵاو بۆ گیانی پاکی شەهیدان سەربەرزی بۆ بنەماڵە وکەس وکاری قوربانیان. دەستخۆشی بۆ خەبات و خۆڕاگری هاوڵاتیانی کوردستان.

هاوپەیمانیی نیشتمانی ٥/۳/۲٠۱۹