سەرگوڵ قەرەداخی: پرسی ژنان لە کۆمەڵایەتیەوە دەگۆڕین بۆ سیاسی

سەرگوڵ قەرەداخی ڕایگەیاند ژنان لە هاوپەیمانیدا پێگەی بەهێزیان هەیە و جەختیشیکردەوە هاوپەیمانی دەیەوێت پرسی ژنان لە پرسێکی کۆمەڵایەتیەوە بگۆڕێت بۆ پرسی سیاسی.

 

 

سەرگوڵ قەرەداخی ئەندامی ئەنجوومەنی سیاسی هاوپەیمانیی نیشتمانی بە دیجیتاڵ میدیای هاوپەیمانی ڕاگەیاند “ئێمەی ئافرەتان لە كۆمەڵگا بۆ گەیشتن بە ئامانجەكانمان ئەبێت پشوو درێژ و كۆڵنەدەر بین و پشتگیری و پشتیوانی پیاوانی ئازادیخواز بەدەست بهێنین”.

 

 

ئەندامەکەی ئەنجوومەنی سیاسی هاوپەیمانی ئەوەشی خستەڕوو “بوونی ئیرادەی سیاسی بەهێز لای هاوپەیمانیی نیشتیمانی بۆ بەرزكردنەوەی ئاستی مافەكانی ژنان واتا هۆشیاری لە هاوپەیمانی و مامەڵەكردن لەگەڵ پرسەكانی ژنان و گواستنەوەی لە ئاستی پرسە كۆمەڵایەتییەكانەوە بۆ پرسە سیاسییەكان و گەیشتن بە دەستەبەر كردنی ماف و دادپەروەری”.

 

 

ڕاشیگەیاند “پێگە و ڕۆڵی ژنان لە هاوپەیمانی بەهێزە و لە هەموو ئۆرگانەكان بەمەرج دانراوە ئەبێت یەك لەسەر سێ‌ ئافرەت بێت و پلانمان هەیە بگاتە نیوە چونكە لای هاوپەیمانی مرۆڤ سەنتەرە هیچ ڕێگریەك نیە لە ئافرەتان بەهۆی مێینە بوونیانەوە”.

 

 

قەرەداخی بۆ ڕۆژی 8 مارس پەیامێك ئاراستەی ژنان دەكات و دەڵێت “ئێمەی ژنان لە كۆمەڵگەدا بۆ گەیشتن بە ئامانجەكانمان دەبێت پشوودرێژ و كۆڵنەدەر بین و پشت بەتواناكانمان ببەستین و پشتیوانی و پشگیری پیاوانی ئازادیخواز بەستبهێنین”.