یەكێتی زانایان داوالە وڵاتانی دونیا دەکات دەنگی خۆیان بەرزبكەنەوە بۆ کۆتایی هێنان بەو شەڕە

بچووکردنەوە گەورەکردن

یەكێتی زانایانی ئیسلامی كوردستان داوا لە كەسایەتییە ئاینییەكان دەكات سەركۆنەی هێرشەکانی توركیا بكەن بۆسەر ڕۆژئاوای کوردستان.

 

 

یەكێتی زانایانی ئایینی ئیسلامی كوردستان ڕاگەیەنراوێكی لەبارەی هێرشەکانی تورکیا بڵاوکردەوە و ڕایگەیاند، “هەڵمەتی هێرشكاری توركیا بۆ سەر ڕۆژئاوای كوردستان نیگەرانییەكی زۆری لای ئێمە وەك زانایانی ئایینی و هاوڵاتیانی كوردستان بە گشتی دروستكردووە”.

 

 

دەشڵێت “وەكو ئەركێكی ئایینی و مرۆیی و نەتەوەیی بە توندی ئیدانەی هەر پەلامارێك دەكەین كە دەستدرێژی بێت بۆ سەر خاك و نامووس و ئاشتی و ئارامی خەڵك، بەتایبەتی بەئامانجگرتنی خەڵكی سڤیل و ئاوارەو دەركردنیان، ئەمانە هەمووی لە ڕوانگەی ئیسلامەوە قەدەغەن و پێویستە مسوڵمانان بەهەموو شێوەیەك لێیان دووربكەونەوە”.

 

 

هەرلە ڕاگەیەندراوەکەدا هاتووە،  “كاری مسوڵمان قوڵكردنەوەی ئارامی و ئاشتی و خۆشەویستییە، نەك هێرش و پەلاماردان و گۆڕینی دیمۆگرافیا، بێگومان تاكە ڕێگا گفتوگۆو دیالۆگ و تێكگەیشتنە، مێژووی ناوچەكەش شاهیدە ئەم جۆرە پەلامارانە چارەسەری كێشەكان ناكات، بەپێچەوانەوە دووبەرەكی و ڕقی زیاتر دەخاتە ناو ئایین و نەتەوە جیاوازەكان و چارەسەرەكان دوورتر دەخاتەوە”.

 

 

یەكێتی زانایانی ئایینی ئیسلامی كوردستان ڕاشیدەگەیەنێت، وەكو ئەركێكی ئایینی و مرۆیی و نەتەوەیی بە توندی ئیدانەی هەر پەلامارێك دەكەین كە دەستدرێژی بێت بۆ سەر خاك و ناموس و ئاشتی و ئارامی خەڵك.

 

 

یەكێتی زانایان داوا لە ئەنجومەنی ئاسایش، نەتەوە یەكگرتووەكان، یەكێتی ئەوروپا، كۆمكاری عەرەبی، كۆنگرەی وڵاتانی ئیسلامی، یەكێتی جیهانی زانایانی مسوڵمان، سەرجەم ڕێكخراوو لایەنە ئاشتیخوازەكانی دونیا دەكات، دەنگی خۆیان بەرزبكەنەوە و پاڵەپەستۆ دروست بكەن بۆ ڕاگرتنی ئەو شەڕو ئاژاوەیە، بە ئومێدی چەسپاندنی ئاشتی و كۆتاییهێنان بە شەڕو كوشتار.

 

 

هەواڵ. شەهێن وەهاب