فرانسوا ئۆلاند: پێویستە یەکێتیی ئەوروپا ئابڵۆقە بخاتە سەر تورکیا

بچووکردنەوە گەورەکردن

سەرۆکی پێشووی فەرەنسا، لەبارەی رەوشی رۆژئاوای کوردستان و ئۆپەراسیۆنی تورکیا دەڵێت “نەک تەنیا قەرزاری کوردین، ئەرکی سەرشانیشمانە بیانپارێزین”.

 

 

فرانسوا ئۆلاند سەرۆکی پێشووی فەرەنسا بە میدیاکانی وڵاتەکەی ڕاگەیاندوە، “لەچوارچێوەی هاوپەیمانیی نێودەوڵەتی کارم لەگەڵ کوردانی سووریادا کردووە، ئەوان تاکە سەرچاوەمان بوون کە لە شەڕی دژی داعش پشتمان پێبەستن، لەرێگەی ئەو هەماهەنگییەی لەگەڵ کورد هەمانبوو لەسەر زەوی، توانیمان داعش لە باکووری سووریا لەناوبەرین”.

 

 

 

ئۆلاند ئاماژە بەوە دەکات “من، دەزانم، کورد ژمارەیەکی زۆر جیهادییان لەنێو کەمپەکانیاندا دەستبەسەرکردوون کە بەشێکیان فەرەنسین و ترسی ئەوە هەیە بتوانن خۆیان رزگاربکەن، ئەوکاتەش نەک تەنیا دەبنەوە هەڕەشە لەو ناوچەیە، بەڵکو دەبنە هەڕەشە بۆ سەر ئەوروپاش، بۆیە لەپێناو پاراستنی خۆمان و بەرژەوەندیمان، پێویستە کورد بەردەوام بن لە باکووری سووریا و خاکیان بەدەستەوە بێت”.

 

 

 

ڕاشیگەیاندوە، “کورد هاوپەیمانی ئێمەن، ئەوان شەڕی دژی داعشیان کرد، لەهەمان کاتدا تورکیا ئەندامی ناتۆیە، چۆن وڵاتێک کە لەگەڵ ئێمە لە هاوپەیمانییەکدایە، دەتوانێت هێرشبکاتە سەر هاوبەشێکی سەرەکیمان، بۆیە لێرەدا دەبێت پرسیار لەبارەی پەیوەندیی تورکیا و ناتۆ بکرێت، دەبێت ئەندامیێتیی تورکیا لە ناتۆ هەڵبپەسێردرێت”.

 

 

 

فرانسوا ئۆلاند لە ماوەی سەرۆکایەتی فەرەنسادا دووجار هاتووەتە هەرێمی کوردستان و یەکەم سەرۆک بوو لەکاتی شەڕی دژی داعش سەردانی سەنگەرەکانی هێزی پێشمەرگەی کوردستانی کردوە.

 

 

هەواڵ. شەهێن وەهاب