هاوپەیمانیی نیشتمانی سەرلەبەری راپۆرتێکی رۆژنامەی ئاژانس رەت دەکاتەوە

بچووکردنەوە گەورەکردن
راگەیانراوێک لە دامەزراوەی راگەیاندنی هاوپەیمانیی نیشتمانییەوە
رۆژنامەی ئاژانس لە ژمارە ١٥٥ی خۆیدا کە رۆژی چوارشەممە بەرواری ٢٠١٩/١٠/٩ بڵاوکراوتەوە راپۆرتێکی پڕ لە زانیاری ناڕاستی لەسەر پەیوەندییەکانی هاوپەیمانیی نیشتمانی بڵاوکردۆتەوە کە ئێمە لە هاوپەیمانیی سەرلەبەری ئەو راپۆرتە رەتدەکەینەوە و رایدەگەیەنین:” هاوپەیمانیی نیشتمانی حزبێکی یاسایی هەرێمی کوردستانە و باشترین ئاستەکانی پەیوەندی هەیە لەگەڵ تێکڕای حزب و رەوت و گروپ و کەسایەتییە سیاسییەکانی هەرێمی کوردستاندا و هەرگیزیش لەسەر حسابی هیچ هێز و کەسایەتییەک هەڵوێستی نەنواندووە، چونکە هاوپەیمانی کارە نەک کاردانەوە و لە وێستەگە جیاوازەکانی رابردووشدا بنەمای پێکەوەژیان و یەکتر قبوڵکردن لەگەڵ هەموولایەکدا بنەمای کارکردن بووە و لە کار و پرۆژەی هاوپەیمانیدا ڕەنگی داوەتەوە”
هاوپەیمانیی نیشتمانی لەگەڵ ئەوەی تەواوی زانیارییەکانی ناو راپۆرتەکەی رۆژنامەی ئاژانس رەتدەکاتەوە، رایدەگەیەنێت “هاوپەیمانی پەیکەری ئۆرگانیی خۆی هەیە و بەرپرس و سەرکردەکانی هاوپەیمانی کەسانی بەرجەستە و دیاری ئەم کۆمەڵگەیەن، ڕۆژنامەکە هەر بەوەی بە ناوی سەرچاوەی دروستکراوی هاوپەیمانییەوە لێداونی وەرگرتووە، متمانە و پیشەییبوونی خۆی خستووە ژێر پرسیارەوە.
جارێکیتریش تەواوی زانیارییەکانی ڕۆژنامەی ئاژانس بە درۆدەخەینەوە و هیوادارین میدیا رۆڵی ئاشتیخوازانە و ئاکاریی پیشەیی خۆی لەدەستنەدات، چونکە دواجار گەلی کوردستان بە زانیارییە ناڕاستەکان ماندووتر دەکرێت.
دامەزراوەی ڕاگەیاندنی هاوپەیمانیی نیشتمانی 10/10/2019