ساڵێک لەخۆراگری و ڕووبەڕوبونەوەی ئاڵنگاریەکان

بچووکردنەوە گەورەکردن

ئەمڕۆ ٩/١١/٢٠١٩ ساڵێك تێدەپەڕێت بەسەر كۆنگرەی بەردەوامی و دامەزراندنی هاوپەیمانیی نیشتمانیدا،
بەم بۆنەیەوە وێڕای پیرۆزباییمان لە هاودیدان، سوپاسی ئیرادەی بەرز و هەوڵی شەو و ڕۆژیان دەكەین بۆ خۆڕاگری و خۆنەویستیان لە پێناو مانەوەی هاوپەیمانیدا، لە كاتێكدا كە هاوپەیمانی ڕووبەڕووی زۆر گرفت كرایەوە و كۆسپی زۆری هێنرایە بەردەم ، شاڵاوی بێ ئومێدکردن لە ھەموو لایەکەوە دەیویست چۆک بە ھاودیدان دابدات، بە واتە وات و پڕوپاگەندە دەیانویست ھاودیدان دەستبەرداری پرۆژەکەیان بن، بە فریوودان و ھەڵخەڵەتاندن دەیانویست پرۆژەکە بکەنە دوکانی سیاسی ، بەڵام هاودیدانی ھاوپەیمانی بە ئیرادەیەكی بەهێزەوە توانیان قۆناغە سەختەكان تێبپەڕێنن، لە كاتێكدا كە بەردەوام بوون لەو قۆناغانە ئاسان نەبوو بۆ هێزێك كە لە دەروازەی دروست بوونیەوە ڕوبەڕوی چەندین قەیرانی جۆر بە جۆر بوویەوە.

 

جەماوەری کوردستان
ھاودیدانی خۆراگر

هاوپەیمانیی نیشتمانی لە قۆناغێكی هەستیاردا بە ئامانجی چاكەی گشتی و سیاسەتی دروست دامەزراوە و هەموو هەوڵێكیشمان بۆ هێنانەدی ئامانجە نیشتمانیەكانمانە، بەدەر لە بەرژەوەندی تاک و گروپ و دەستەیەکی دیاریکراو، جەماوەری کوردستان دڵنیا دەكەینەوە كە بە ئیرادەیەكی بەهێزتر لە ڕابردوو، خۆمان بۆ قۆناغی داهاتوو ئامادەكردوە و باوەڕیشمان وایە هێزێك بۆ گۆڕانكاری خۆی ڕاگەیاندبێ فشارەكان هەرچەند گەورەشبن پاشەكشەی پێناکەن.

 

ھاوپەیمانی ئەوە دووپات دەکاتەوە کە ئەرکی قورس و گرانی لەئەستۆدایە بۆیە کارمان سەختە و دژوارە بەڵام ئەستەم نیە، بە وورە بەرزی ھاودیدان و ھیواو ئومێدمان بە داھاتوو قۆناغی نوێ بەسەرکەوتوویی تێدەپەرێنین و ھەنگاوی مەزن ھەڵدەگرین کە قۆناغی گەشە سەندن و فراوان بوونە.

 

دووبارە سوپاسی هاودیدان و هەموو ئەو دۆستانە دەكەین كە پشتیوانمان بوون لە ڕووی مادی و مەعنەویەوە لە بەردەوامیدان بە پەیامەكانی هاوپەیمانی.

 

ئەنجومەنی سیاسی
هاوپەیمانیی نیشتمانی
٩/١١/٢٠٠١٩