ئیبراهیم حاجی زەڵمیی
14, ئازار 2019

مرۆڤ سەنتەری لە پیرۆزیەكانە

شەیتان یان ئەهریمەن…

ئەو دێوەزمەی كە ئاین هەردەم لە رێگەی دەقەكانیەوە جەختی لەسەردەكاتەوە كە نەفرەتیەو دەبێت ئێمەی مرۆڤ لێی بەدوور بكەوین.

بەرای من شەیتان هەرچیەك بێت، ئەوەندەی من لەدەقی قورئانەوەو لەو دەقانەی تری ئاینەكانی ترەوە خوێندنەوەیم بۆ كردوە، شەیتان هێمایە بۆ هێزێك كەدژە مرۆڤە و مرۆڤی لە لابێرێزە.

پاشان ئەوەنیە لەبەرئەوەی نەفرەتیە و خوا رقی لێیەتی كە بێ ئەمری خوای كردووە.. بەڵكو پێم وایە شەیتان بۆیە شەیتانەو ئەهریەمەنەو نەفرەتیەو مرۆڤ لێی دەبێت بەدووربكەوێت، لە بەرئەوەیە كە لەگەڵ مرۆڤدا ناكۆكە نەك لەگەڵ خوا.. لەبەرئەوەی مرۆڤی بە پیرۆز نەزانی ..لە قورئاندا كەباسی لێوەدەكرێت و هۆكاری نەفرەتیكردنی باس دەكرێت، لەبەرئەوەیە كرنوشی رێز نابات بۆ ئادەم و خۆی لە ئادەم بەزیاتر دەزانێت و مرۆڤ(ئادەم) بێ رێز تەماشە دەكات..

بۆیە لەمەوە تێدەگەین كە:

– شەیتانن هەموو ئەوانەی كە مرۆڤ بێرێز تەماشە دەكەن و بەكەم سەیری مرۆڤ دەكەن.

– ئەهریمەنن ئەوانەی كەخۆیان لەمرۆڤەكان بەزیاتر دەگرن و خۆیان لەمرۆڤەكانی تر پێ پیرۆزترە.

ئەوەشی پێی وابێت كەشەیتان بۆیە شەیتان و ئەهریمەنە چونكە بێ ئەمری خوایكردوە ئەوە بەهەڵەداچوە، چونكە ئەوە لەگەڵ دادپەروەری خوادا نایەتەوە كە مرۆڤەكان هەزاران جار بێ ئەمری خوابكەن دواجار خودا بفەرمێ من تۆبەتان لێوەردەگرم بەڵام بەیەكجار بێ ئەمری ئەهریمەن خودا نەفرەتی هەمیشەیی لێبكات فەرقی دروستكراوەكانی خۆی بكات.!!