لە چەند ناوچەیەکی هەرێمی کوردستان ئەگەری دروستبوونی لافاو هەیە

کەشناسی هەرێمی کوردستان لەبارەی درووستبوونی لافاوەوە هۆشداری دەدات و ڕایدەگەیەنێت لە چەند ناوچەیەکی هەرێمی کوردستان ئەگەری ڕوودانی لافاو بەهیزە.

 

بەڕێوەبەرایەتیی گشتیی کەشناسی و بومەلەرزەزانی هەرێمی کوردستان له‌ ڕاگه‌یه‌نراوێكدا ئەوەی خستەڕوو “رۆژی یەکشەممە 24ی ئازار لە کاتەکانی شەودا تا بەرەبەیانی رۆژی دووشەممە رێژەی بارانبارین زیاتر دەبێت”.

 

لە ڕاگەیەنراوەکەدا ئەوەش خراوەتەڕوو “لە باشوری پارێزگای هەولێر و کەرکوک و گەرمیان بەتایبەتی لە ناوچەکانی (دیبەگە، گوێر، مەخمور، قەراج، دووزخورماتوو، کفری، ئامرلی، حەویجە) مەترسیی بەرزبوونەوەی ئاستی ئاو هەیە”.

 

هه‌ر له‌ راگه‌یه‌نراوه‌كه‌ی كه‌شناسی هاتوو ئەم شەپۆلی بارانبارینە تا کۆتایی هەفتە بە شێوەیەکی نمەبارانی پچڕپچر بەردەوام دەبێت لە کات و شوێنی جیاجیادا.