هاوپەیمانی پڕۆژەیەکی تایبەت بە دۆخی کەرکوک دەداتە لایەنە سیاسیەکان

دەڤەری کەرکوکی هاوپەیمانیی نیشتمانی پڕۆژەیەک پێشکەش بە لایەنە سیاسیەکان دەکات و داوای ئەنجامدانی هەڵبژاردنی ئەنجومەنی پارێزگای کەرکوک دەکات و جەختیشدەکاتەوە دەبێت پەرە بە پێکەوەژیان بدرێت و هێزە چەکدارەکان لە شارەکە بچنە دەرەوە.

 

کامیل جەلال کارگێڕی دەڤەری کەرکوکی هاوپەیمانیی نیشتمانی بە دیجیتاڵ میدیای هاوپەیمانی ڕاگەیاند “ئەو پڕۆژەیەی ئامادەمانکردووە دەیدەینە سەرجەم لایەنە سیاسیەکانی کەرکوک لە سەرجەم پێکهاتەکان”.

 

وتیشی “لە پڕۆژەکەدا داوامانکردووە مرۆڤ بکرێتە سەنتەری کاری  لایەنە سیاسیەکان لە کەرکوک بەبێگوێدانە نەتەوە و دین ڕەگەز”.

 

ڕوونیشیکردەوە “بڕگەیەکی تری پڕۆژەکەمان ئەوەیە کە داوا دەکەین هێزە چەکدارەکان لە کورکوک بچنە دەرەوە و ئەمنیەتی شارەکە بسپێردرێت بە پۆلیسی کەرکوک”.

 

وتیشی “داوا دەکەین پاراستنی سنوری کەرکوک بە هێزێک بسپێردرێت کە لەسەرجەم پێکهاتەکانی شارەکە پێکهاتبێت و هیچ لایەنێک پەراویز نەخرێت تێیدا”.

 

ناوبراو ئاماژەی بەوەشکرد “داوامانکردووە هەوڵی تەواو بدرێت و تواناکان یەکبخرێن بۆ پاراستنی کەلتوری فرەیی کەرکوکیەکان و شوێنە مێژوویەکانی شارەکە”.

 

کارگێڕی دەڤەری کەرکوکی هاوپەیمانی ئەوەشی خستەڕوو ئەنجامدانی هەڵبژاردنی ئەنجومەنی پارێزگای کەرکوک بەزوترین کات بە پێویست دەزانن.

 

تیشکی خستەسەر ئەوەش کە پێکهێنانی قەوارەیەکی سیاسی هاوبەش لەنێوان سەرجەم لایەنە سیاسیەکانی پێکهاتە جیاوازەکانی کەرکوک لە پڕۆژەکەی هاوپەیمانیدا جیگیرکراوە.