عگید سەلیم
7, نیسان 2019

سیاسەتا كو ئومێدو رحا مە تیرور كری !

ل گەلەك ئە زموون و جڤاكێن جودا جودا نوخبەیا دەستهەلاتدار و كارەكتەرێن سیاسی ب پلان و هزرو هوشیاری و دوربینیا خوە ,زور جاران بووینە فاكتەرێ‌ ئاراستەكرنا جڤاكی ژ قوناغەكا سەخت و دژوار و بێ‌ دادیێ‌ و بندەستیێ‌ و پاشكەفتنێ‌ بەر ب ئاسویەك رووناك و دونیایەك ئازادو دیموكراس و بەختەوەر .

 

لێ‌ براستی ئەزموونا گەلێ‌ كورد ب تایبەتی ل باشورێ‌ كوردستانێ‌ پێچەوانەی ڤێ‌ راستیێ‌ یە ل شینا كو نوخبەیا سیاسی ببنە رێبەر و رێنیشاندەر ژبوو ژیانەك مروڤدوست و دیموكراسیخواز و نەتەوەیی ونیشتیمانی ,بووینە رێگر بەرامبەر بنەجهبوونا خەونێن گەلێ‌ مە و ڤەگەراندنا تاك و جڤاكێ‌ مە بەرەف قووناغا میرگەهێن كوردی ل ناڤەراستا سەدێن بوری ژ دیروكا گەلێ‌ مە .

 

میناك ژی ژبوو ڤێ‌ راستیێ‌ ئەوە كو سالێن هەشتێ‌ و نوتان ژ سەدێ‌ بیستێ‌ شاهیدێ‌ چەندین بویەرێن دیروكینە ل باشورێ‌ كوردستانێ‌ ,ئەڤان ریدان و بویەران باندورەكا ئێكجار مەزن دئاستێ‌ تێكوشینا گەلێ‌ مەو خەون وهیڤی وئومێدو مان و نەمانا گەلێ‌ مە ڤە هەبوو راستەوخو و نەراستەوخو بوونە هێڤینێ‌ ڤی كیانی یێ‌ كو دبێژنێ‌ هەرێما كوردستانێ‌ واتە بەرخودان و قوربانیا هەرە سەرەكی گەل بوویە و ب هیچ ئاوایەكێ‌ نابیت هێزەك یان لایەنەك ڤان دەستكەفتیا بكەتە بازرگانیا شورەشێ‌ و منەت ل سەر خەلكَ مە .و گرنگترین بوویەر ژی ب كورتی ئەڤێن ل خوارێ‌ نە .

 

یا ئێكێ‌ پروسا ئەنفالا سالا 1988 وەك ئێك ژ تاوانێن مەزنێن چەرخێ‌ بیستێ‌ كو دژی گەلێ‌ مە هاتیە ئەنجامدان و ب دەهان هزار هاوولاتی بوونە قوربانی و زەرەرەكا زور ب گەلێ‌ كورد و كوردستانێ‌ كەفت ..

 

بەلام دهەماندەمدا بوو ژێدەرێ‌ كەلەكەبوونا كەرب و كینەكا دژوارا خەلكی و ئەو راستی دیار بوو كو بتنێ‌ یان رزگار بوون ژ دەستێ‌ رژێما وی سەردەمی یان مرنەكا سەربەرزانە ل دژی فاشیزم و هوڤایەتیا دەولەتا عیراقێ‌ !ریدانا دووێ‌ یان وەرچەرخانەكا دیا جڤاك و گەلێ‌ مە سەرهلدانا خەلكێ‌ كوردستانێ‌ وەك هەلچوون و پەرچەكردارەكا جەماوەری كو تەڤایا چین و توێژان و خەلكێ‌ كوردستانێ‌ ب گشتی تێدا بەشداری كری بێ‌ گومان ئێك ژلاپەرێن هەرە زێرین و شانازیێن گەلێ‌ مەیە و ئەڤێ‌ سەرهلدانێ‌ ئەو پەیام گەهاند كو چ جارا گوپیتكا زولم و ستەمێ‌ و سیاسەتێن جینوسایدێ‌ نەشێن خوە ل هەمبەر ئیرادا مللەتی بگرن و تاسەر خەونێن وان ژ بوو كوێلەكرن و بێ‌ دەنگكرنا مللەتی بوو وان بچیتە سەر .

 

هەروەسا كوچا ملیونی ئەو كوچا ژ پێخەمەت رتكرنا دیكتاتوریەتێ‌ كو بوویە ئێك ژ تراژیدیاێن وی سەردەمی و ویژدانا مروڤایەتی هەژاندی و نەتەوێن ئێكگرتی نەچاركری كو بریارا (688) دەربێخێت و پاراستنا خەلكێ‌ سڤیلێ‌ كوردستانێ‌ كریە بەرپرسیارەتیەك یاسایی وئەڤ هەرێمە بوو مە دروست بوو .ژ ریدانێن هەرە گرنگێن دیروكا مە بوو .

 

ب كورتی ڤان ریدانێن گرنگ و كاریگەركو دەستكەفتێن ئێجگار مەزن هەبوون ب خوین و خەبات و قوربانی و خەونێن نەتەوەیەكێ‌ هاتنە ئافراندن كو ب دەیان سالان بوو ژ پێخەمەت دەستڤەئینانا ئازادیێ‌ ل سەر پێیان بوو .

 

ل شینا كو پارتێن سیاسی ب تایبەت ئەوێن دەستەلاتدار ڤان نرخ و بهایێن گرنگێن مورالی و ئەخلاقی و نەتەویێن گەلێ‌ مە بكەنە هێزو وەبەرهێنەرەكا مەزنا سیاسی ل سەر بكەن و ب وەفا بن بوو ڤان قوربانیێن خەلكێ‌ كوردستانێ‌ لێ‌ ب مخابنیڤە بوونە داهێنەرێن تالانیێ‌ و دزیێ‌ و گەندەلیێ‌ وشەرێ‌ براكوژیێ‌ و دووئیدارەئیێ‌ و راكێشانا هێزێن داگیركەر بوو كوردستانێ‌ .ب

 

یست و هەشت سالێن بووری و دسالڤەگەرا وان ریدانان كو مللەتێ‌ مە ب هێزا خوە هاتە دناڤ كاروانێ‌ دیروكێ‌ دا و هاتیە دناڤ شانویا سەختا سیاسەتا روژهەلاتا ناڤیندا ,گرنگە بپرسین ئایا ئومێدەك هەیە كو ئەڤ فورمێ‌ حوكمرانیێ‌ و عەقلیەتا هێزێن كلاسیكێن كوردی مە ژ ڤان كێشەو ئاریشەیێن مەزن قورتال بكەت یان د دل و دەمارو لاشێ‌ ڤی جڤاكی روح و ئیرادا بیست و هەشت سالێن بوری پەنهانە و تە هند دیت ئەڤ عەقلیەتە رامالی و سەروەرییەك دن یا دیروكی تومار كر .