کەمپەینێک بۆ هاوکاری خەڵکی لوڕستان ڕادەگەیەنرێت

گروپی موزیکی لوڕ بە هاوکاری بەڕێوەبەرایەتی گشتی ڕۆشنبیری و هونەری سلێمانی کەمپینێک بە ناوی (ژیان بۆ لورستان)رێکدەخات.

 

لە وەڵامی پرسیاری دیجتاڵ میدیای هاوپەیمانی سەبارەت بە کات و شوێن و ئامانجی کەمپینەکە و چۆنیەتی بەڕێوەچوونی، نزار زێوێی ئەندامی گروپی لوڕ ووتی “ئەم کەمپینە لە ڕۆژی یەکشەممە بەرواری ۲۰۱۹/٤/۷ لە هۆڵی مۆزەخانەی سلێمانی دەست پێدەکات و یەک هەفتە دەخایەنێت”.

 

وتیشی “کۆتا ڕۆژی کەمپینەکە بە کۆنسێرتێکی گۆرانی و موزیک لە تەلاری هونەر کۆتای دێت بە بەشداری ۱۰ هونەرمەندی شاری سلێمانی مەبەست لەم کەمپینە کارێکی خێرخوازییەو بۆ کۆکردنەوەی کۆمەک و هاوکارییە بۆ زیانلێکەوتوانی لافاوەکەی ئەم دواییەی لوڕستانی ڕۆژهەڵاتی کوردستان”.

 

ئایا لە کۆنسێرتەکەدا هونەرمەندانی لوڕستان بەشدارن؟

نزار زێوێی: لە ڕاستیدا ئەوان زۆر ئامادەییان تیادایە بەشداری بکەن بەڵام لەبەر ئەوەی بانگهێشتی ئەوان ئەرک و تێچوونی زۆر بوو ئێمەش لەم کەمپینە خۆبەخشین نەمانتوانی بانگهێشتیان بکەین و پێمان باش بوو ئەو تێچوونە بگەڕێتەوە بۆ کۆمەکی زیانلێکەوتوان.

 

ئایا کۆنسێرتەکە و کەمپینەکە هەر لە شاری سلێمانی دەبێت یان شارەکانی تری هەرێمی کوردستانیش بەشدار دەبن؟

 

نزار زێوێی: لە ئێستادا تەنها لە شاری سلێمانییە وە لە ڕێگەی دیجتاڵ میدیای هاوپەیمانییەوە داوا لە سەرجەم لایەن و حزب و بەرپرسان و خاوەن کۆمپانیاکان دەکەین کە پەیوەندیمان پێوەبکەن و هاوکارمان بن تا کەمپینەکەمان فراوان بکەین و لە گشت شار و شارۆچکەکان ئەنجامی بدەین، وە داوا لە خەڵکیش دەکەین بەشداربن بە کڕینی بلیتی کۆنسێرتەکەمان چونکە کارێکی خێرخوازییە و داهاتەکەی بۆ کۆمەکی زیانلێکەوتوانی لافاوەکەی لوڕستانە.

 

گروپی موزیکی لوڕ لە ساڵی ۲۰۰۸لە شاری سلێمانی دامەزراوە خاوەنی ۸ ئەلبومی تۆمار کراو و ٤۰ ڤیدۆکلیپە و چەندین کۆنسێرتی کردووە لە وڵاتانی ئەوروپاو ئاسیا و خاوەنی بارەگاو ستۆدێوی تایبەت بە خۆیەتی لە سلێمانی.