کادرانی یەکێتی داوای لێکۆڵینەوە لە تۆمەتبارانی ١٦ ئۆکتۆبەر دەکەن

پەڕلەمانتارێكی پێشووی عێراق ڕایدەگەیەنێت، ئێمەی كەركوكی قومارمان پێوەكراوە و دۆڕێنراوین.

شوان داودی پەڕلەمانتاری پێشووی یەكێتی بە دەنگی ئەمریكای ڕایگەیاند، كەركوك و ناوچە كێشە لەسەرەكان تەنها زەرەرمەندی ڕیفراندۆم و ١٦ی ئۆكتۆبەر بوون

وتیشی”لەڕێگەی داواكارییەكی فەرمییەوە داوامان لە داواكاری گشتی و ئەنجومەنی دادوەری كردووە لێكۆڵینەوە بكەن و ڕاستییەكانمان بۆ ئاشكرابكەن، چونكە ئێمەی كەركوكی قومارمان پێوەكراوە و دۆڕێنراوین، كەچی دەست بەرداریشمان نابن و موزایەدە و كڕین و فرۆشتنمان پێوە دەكرێ

ئاماژەی بۆ ئەوەش كرد، دەزانین كەس لێپرسینەوەی لەگەڵ ناكرێت و هەمووی خاوەن هێزە، بەڵام دەمانەوێ بزانین بۆ وامانلێكرا، تا دەستبەردارمان بن و چیتر كڕین و فرۆشتنمان پێوە نەكرێ

ڕوونیشیكردەوە، پرسی ١٦ی ئۆكتۆبەر لەنێوان یەكێتی و پارتیدایە و ئەو دوو هێزەش بەرپرسیارن لە دۆخی ئێستای كەركوك، ئێستا لەبەرچاوی یەكێتی شارەكە تەعریب دەكرێت، بەرێوەبەرە كوردەكان لادەبرێن، ئیهانەی كورد دەكرێت و یەكێتی هیچی پێناكرێت، پارتیش هیچی بۆ كەركوك پێ نییە

ژمارەیەك كادیری یەكێتی لە پارێزگای كەركوك و ناوچە كێشەلەسەرەكان واژوویان بۆ لێپرسینەوەو لێكۆڵینەوە لە ڕووداوەكانی ١٦ی ئۆكتۆبەری ساڵی ٢٠١٧ كۆكردوەتەوە و داوا دەكەن چارەنووسی شارەكەیان یەكلایی بكرێتەوە.

لە ١٦ ئۆکتۆبەری ٢٠١٧ داو لە ڕێککەوتنێکی پێشوەختەی چەند هێزێکی کوردیدا کەرکوک و ناوچەکانی تری مادەی ١٤٠ ڕادەستی هێزە عێراقیەکان و حەشدی شەعبی کران.