ئاڵۆزی و دڵەراوکێ لە سنوری دوبز پەرە دەسەنێت

ئاڵۆزی و دڵەڕاوکێ لە سنوری دوبز پەرە دەسەنێت و جوتیارێکیش ڕایدەگەیەنێت عەرەبە هاوردەکان نەوەد تۆن دەغڵو دانیان بە زۆرە ملێ دروێنە کردوە

هێرش حسێن کە جوتیارێکى کوردى خەڵکى گوندى مامەى سەربە قەزاى دوبزە بەدەنگى ئەمەریکاى راگەیاندوە “عەرەبە هاوردەکان بەنهێنى دەڕاسەیان بردۆتە نێو زەویەکەم و خەلەو خەرمانەکەیان دروێنە کردووم”. 

 

ئەوەشی خستۆتەڕوو “ئەو دانەوێڵەى عەرەبەکان بردوویانە بە نزیکەى 90 تۆن مەزەندە دەکرێت”. 

 

بە پێی زانیاریەکان ژمارەیەک عەرەبى هاوردە بەچەکەوە رۆیشتنە سەر گوندى پەڵکانەى سەر ناحیەى سەرگەڕان و هەوڵى دەرکردنى کوردەکانیان دەکرد. 

 

مەریوان نادر یەکێک لەنوێنەرانى کەرکوک لەپەرلەمانى عێراق بەدەنگى ئەمەریکاى ڕاگەیاند “ئێمە تەنها دۆخەکەمان هێور کردەوە و نەمانهێشت شەڕ ڕووبدات، ئەگینا کێشەکان وەک خۆیەتی”. 

 

ماوەیەکە کێشەی جوتیارە کوردەکان و عەرەبە هاوردەکانی سنورەکە سەری هەڵداوەو تا ئێستا بەبێ چەرەسەر ماوەتەوە.