پێشمەرگە هێرشی بۆ سەر بنكەی چەكدارانی داعش دەستی پێكردەوە

بە هاوكاری هاوپەیمانان پێشمەرگە لە چەند قۆڵێكەوە هێرشی بۆ سەر بنكەی چەكدارانی داعش لە نزیك شارۆچكەی دوزخورماتوو دەستپێكرد.
جەمال ساڵح، بەڕێوەبەری شارەدێی زنانە دەڵێت “سەرلەبەیانی ئەمڕۆ، ھێزەکانی پێشمەرگەی کوردستان بە ھاوکاریی فڕۆکەکانی ھاوپەیمانان، لە سنووری گوندەکانی شۆراو و پەلکانەی سەر بە شارەدێی زنانە، ئۆپەراسیۆنێکیان دژ بە چەکدارانی داعش ئەنجام داوە و تائێستاش بەردەوامە”.
جەختیشی کردەوە کە لە ئەنجامی ئۆپەراسیۆنەکەدا، مۆڵگە و بارەگاکانی چەکدارانی داعشی تێدا کراوەتە ئامانج، ٣ چەکداری ڕێکخراوەکە کوژراون و ”بەداخەوە ٢ پێشمەرگەش بریندار بوون”
لەهەمان کاتتدا عەلی حسێنی، وتەبێژی حەشدی شەعبی لە میحوەری باكور ئاشکرای کردووە، هاوپەیمانان چەند بنكەیەكی داعشیان لە نێوان شارۆچكەكانی كفری و دوزخورماتوودا بۆردومانكردووە، كە داعش بەكاری هێناون و دواتر پێشمەرگە هێرشی كردوونەتەسەر.
وتیشی”هەماهەنگیمان لەگەڵ پێشمەرگە هەیە و ئاگاداری جوڵانە سەربازییەكەین، بەڵام سنورەكە لەژێر دەسەڵاتی پێشمەرگەدایە”.