ئەڵمانیا داواکەی ئەمریکای ڕەتکردەوە سەبارەت بە ناردنی هێزەکانی بۆ سوریا

بچووکردنەوە گەورەکردن

ستیڤن سایبێرت ووتەبێژی حکومەتی ئەڵمانیا ڕایگەیاند، داواکەی ئەمریکامان بۆ ناردنی ڕاوێژکاری سەربازی بۆ سوریا ڕەتکردەوە.

 

 

 

ووتەبێژەکەی حکومەتی ئەڵمانیا لە کۆبوونەوەیەکی ڕۆژنامەوانیدا ئەمڕۆ ڕایگەیاند” ئەڵمانیا ڕاوێژکاری سەربازی ڕەوانەی سوریا ناکات و پابەند دەبێت بەو ڕێوشوێنانەی کە ئێستا گرتوویەتیە بەر لە چوارچێوەی هاوپەیمانی نێودەوڵەتی دژی داعش”.

 

 

 

ئەمەش لە کاتێکدا جەیمس جێفری نێردەی تایبەتی ئەمریکا بۆ کار و باری سوریا بە میدیاکانی ئەڵمانیای ڕاگەیاند” لە کاتی سەردانکردنی ڕۆژی هەینی ڕابردوو بۆ بەرلین، داوای کرد لە حکومەتی ئەڵمانیا پشتیوانی هێزەکانی سوریای دیموکرات بکات و هێز ڕەوانەی ڕۆژئاوای کوردستان بکات”.

 

 

 

ئەوەشی خستەڕوو” دەمانەوێت هێزەکانی ئەڵمانیا ببنە جێگرەوەی بەشیک لە هێزەکانمان لە سوریا و داوای لە حکومەتی ئەڵمانیا کردووە، هێزی ڕاوێژکاری، شارەزا لە بواری لۆجیستی ڕەوانەبکات”.

 

 

 

ئەمەش لە کاتێکدایە ساڵی ڕابردوو دۆناڵد تڕەمپ بڕیاری کشانەوەی هێزەکانیدا لە سوریا و ئەمەش کاردانەوەی نێودەوڵەتی بەدوای خۆیدا هێنا، ئەم بڕیارە وایکرد ئەمریکا بە بڕیارەکەیدا بچێتەوە و ٤٠٠ ڕاوێژکاری سەربازی بهێڵێتەوە.

 

 

 

هەر لەسەرەتای دروستبوونی داعش لە سوریا، چەندین جار ئەمریکا داوای لە وڵاتانی ئەندام لە هاوپەیمانی دژی ڕێکخراوی داعش کردووە پشتیوانی زیاتری سوریا بکەن.